जापानमा राम्री–राम्री युवतीहरू किन बन्छन् भूत? हेलोविनमा देखियो अनौठो रूप, टोकियोका सडकमा आकर्षक पहिरन र डरलाग्दा मेकअपको रौनक!

टोकियो, जापान। जापानको राजधानी टोकियोमा शनिबार हेलोविन पर्व विशेष उत्साहका साथ मनाइएको छ। आकर्षक पहिरन, डरलाग्दा मेकअप र अनौठा वेशभूषामा सजिएका युवायुवतीहरूले सडक तथा विभिन्न उत्सवस्थललाई रंगीन बनाएका छन्।
हेलोविनका अवसरमा राम्री–राम्री युवतीहरूसमेत भूत, पिशाच, राक्षस तथा चर्चित चलचित्र र एनिमेका काल्पनिक पात्र बनेर सार्वजनिक कार्यक्रममा सहभागी भएका थिए। उनीहरूले डरलाग्दो रूप धारण गर्नुको मुख्य उद्देश्य मनोरञ्जन, सिर्जनात्मकता र आफ्नो कला प्रस्तुत गर्नु हो।
हेलोविनको उत्पत्ति र ऐतिहासिक महत्त्व
हेलोविनको इतिहास प्राचीन सेल्टिक समुदायको ‘साम्हेन’ (Samhain) पर्वसँग जोडिएको छ। करिब दुई हजार वर्षअघि आयरल्यान्ड, बेलायत र आसपासका क्षेत्रमा बसोबास गर्ने सेल्टिक समुदायले अक्टोबर ३१ मा यो पर्व मनाउने गर्थे। उनीहरूको विश्वासअनुसार त्यस रात जीवित र मृत आत्माबीचको दूरी कम हुने गर्दथ्यो। त्यसैले दुष्ट आत्माबाट जोगिन मानिसहरू अनौठा भेषभूषामा सजिने गर्थे। पछि इसाई परम्पराको ‘अल सेन्ट्स डे’ को पूर्वसन्ध्यासँग जोडिँदै अक्टोबर ३१ को रात ‘हेलोविन’ नामले प्रचलित भयो।
जापानमा भने हेलोविन विशेषगरी कोस्प्ले, फेसन र मनोरञ्जनको पर्वका रूपमा लोकप्रिय बनेको छ। यस वर्ष इकेबुकुरोमा आयोजित ‘हेलोविन कोस्प्ले फेस्टिभल २०२६’ मा पनि ठूलो संख्यामा मानिस सहभागी भएका थिए। गत वर्ष उक्त तीनदिने महोत्सवमा करिब १ लाख ६० हजार मानिस आएका थिए।
यसैबीच, भीड नियन्त्रण गर्न शिबुया र सिन्जुकुमा प्रहरीले सुरक्षा निगरानी बढाएको थियो। शिबुयाको हाचिको मूर्तिसमेत बार लगाएर घेरिएको थियो।